BSc rannsókn: Andleg líðan, heilsa og MS. Þátttakendur óskast!

Hanna Heiða Lárusdóttir er að ljúka við BSc gráðu í sálfræði við Háskólann í Reykjavík. Lokaverkefni hennar, Andleg líðan, heilsa og MS, snýr að heilsu og líðan fólks með MS. Hún biðlar nú til MS-greindra um að svara stuttri könnun sem nálgast má á vefnum.

Sjálf greindist Hanna Heiða með MS í apríl 2016.

 

Hönnu Heiðu fannst mikilvægt að kanna samhengið á milli andlegrar líðan, heilsu og MS, þar sem henni finnst einstaklega lítið fjallað um andleg málefni MS, sérstaklega í ljósi þess að erlendar rannsóknir sýna að MS-greindir eru mun verr staddir andlega en þeir sem eru heilbrigðir.

 

Til þess að afla nauðsynlegra gagna til að byggja rannsóknina á, hefur Hanna Heiða útbúið spurningalista á netinu sem hún biður fólk með MS-greiningu um að svara. Það tekur aðeins um 5-7 mínútur að svara. Könnunin hefur öll tilskilin leyfi og er órekjanleg til svarenda.

MS-félagið hvetur fólk til þátttöku. Þeim mun meiri þátttaka, þeim mun áreiðanlegri niðurstaða. Vinsamlegast svarið fyrir lok mars.

Könnunina má finna hér

  

 ----- 0 -----

 

Þess má geta að MS-félagið býður nú upp á þjónstu sálfræðings til reynslu fram til loka júní. Félagsmenn greiða aðeins 2.500 kr. fyrir viðtalið fyrstu þrjú skiptin. Hægt er að bóka á netinu.

Sjá nánar um þjónustuna hér

 

 

Bergþóra Bergsdóttir, fræðslufulltrúi

 

Fræðslubæklingar:

MS-sjúkdómurinn – Hugræn færni

Bæklingurinn fjallar um hvernig og hvers vegna MS getur haft áhrif á hugræna færni einstaklinga með MS, svo sem minni, einbeitingu, hugsun og innsæi, og hvað sé til ráða. Útskýrt er hvernig taugasálfræðileg skoðun fer fram og hagnýtar ábendingar gefnar um hvernig hægt er að meðhöndla hugræn einkenni svo þau hafi sem minnst áhrif á daglegt líf. Einnig er útskýrt hvernig hugræn einkenni einstaklings geta haft áhrif á aðstandendur. Það er því æskilegt að fjölskylda og vinir kynni sér efni bæklingsins líka.

 

MS-sjúkdómurinn – Persónuleiki og háttalag

Flestir MS-greindir upplifa á einhverjum tímapunkti tilfinningar eins og sorg, gremju eða reiði yfir því að hafa sjúkdóminn og að þurfa að lifa með honum. Tilfinningarnar eru öllum skiljanlegar og flestum tekst að vinna úr þeim. Erfiðara er hins vegar að skilja þær breytingar á háttalagi og persónuleika MS-greindra sem orsakast af sjúkdómi þeirra. Bæklingurinn hefur að geyma upplýsingar sem auka skilning og gefur ráð og valkosti sem geta komið að notum. Í honum er lýst helstu breytingum sem geta orðið á háttalagi og persónuleika einstaklings ásamt því að koma með góðar ábendingar um hvernig takast megi á við vandann. 

 

MS-sjúkdómurinn – Tilfinningaviðbrögð

MS er óvæntur „gestur“ sem er kominn til að vera. Hann getur þýtt ýmis konar missi, bæði fyrir þá einstaklinga sem fá MS sem og fjölskyldur þeirra sem þurfa oft á tíðum að aðlaga sig að breyttum aðstæðum. Markmiðið með bæklingnum er að lýsa algengum tilfinningaviðbrögðum fólks með MS ásamt því að koma með tillögur um hvernig hægt er að takast á við þau.