Fríða Rún, íþróttanæringarfræðingur, gefur hlaupurum góð ráð

Á PEPPI MS-félagsins fyrir hlaupara sína í MS-húsinu sl. þriðjudag var meðal annars boðið upp á fyrirlestur Fríðu Rúnar Þórðardóttur, íþróttanæringarfræðings með meiru, um lokaundirbúning fyrir maraþonið.

Hún sagði m.a. að mikilvægt væri að huga að mataræði og vökvainntöku og passa upp á kolvetnin. Einnig þyrfti að huga að því í tíma í hverju við ætluðum að hlaupa. Ekki síst þyrftum við að huga að hvíldinni og fá góðan og endurnærandi nætursvefn.

Fríða Rún gaf okkur nokkur hollráð í tengslum við hlaupið – daginn áður:

• Forðast mikið álag daginn fyrir
• Hafa skó, föt og númerið klárt
• Ákveða hvernig þið komist á staðinn & hvar þið ætlið að leggja bílnum ef á bíl
• Forðast mjög þunga máltíð
• Fara snemma að sofa

Þá gaf hún hollráð í tengslum við hlaupið – að morgni hlaupadags:

• Vakna tímalega, minnst 2 klst fyrir
• Borða 2 klst fyrir hlaupið
• Borðum aðeins það sem við erum vön
• Flýtum okkur ekki, forðumst allt stress
• Leggjum tímanlega af stað og höldum planinu
• Hita rólega upp í 5-7 mínútur, léttar teygjur
• Finna WC og fara tímanlega í röðina

Og gullkorn til að hafa í huga á ráslínunni og í hlaupinu sjálfu:

• Hafa rásnúmerið framan á
• Festa flöguna á fótinn
• Fara skynsamlega af stað, betra að fara rólega af stað og vinna upp heldur en að fara of skart af stað
• Njóta samverunnar við aðra hlaupara
• Njóta hvatningarinnar fá áhorfendum, veifa þeim ef þið getið
• Hafa gaman hvernig sem aðstæður eru

Fyrirlesturinn var mjög fróðlegur og má finna glærur Fríðu Rúnar hér.

Mynd: Creative Common leyfi