HJÁLPARTÆKI: MEIRI GETA OG AUKIÐ ÖRYGGI

 

Einhverjum notendum hjálpartækja gæti þótt erfitt að horfast í augu við að þurfa að nota hjálpartæki en gott er að hafa í huga að hjálpartæki eru til þess að létta notendum lífið og gera þeim kleift að hafa orku eða getu til að gera meira en ella. Það er því um að gera að líta jákvæðum augum á hjálpartæki og sem þægilegan ferðafélaga.

 

Sumir þurfa að gefa sér einhvern tíma til að venjast tilhugsuninni þar sem þeir telja að með því að þurfa á hjálpartækjum að halda hafi þeir beðið ósigur gagnvart framgangi sjúkdómsins. Sumir eru jafnvel feimnir við að nota hjálpartæki vegna þess að þeir óttast fordóma og feimnir við að sýna sig t.d. með göngugrind, í hjólastól eða á rafskutlu.

 

Allt eru þetta eðlilegar hugsanir. Best er að gefa sér þann tíma sem þarf til að komast yfir „hjallann“ með því að vega og meta kosti þess að nota hjálpartæki. Flestum, ef ekki öllum, finnst hið daglega líf mun þægilegra þegar þeir eru komnir með hjálpartæki við hæfi.

 

Guðrún hafði fengið hjólastól fyrir tveimur árum en geymdi hann í geymslunni. Hún var einhvern veginn ekki tilbúin til að nota hann því hann gerði sjúkdóminn svo sýnilegan. Heldur vildi hún sleppa því að fara út ef hún treysti sér ekki til að ganga. Henni fannst það þó leiðinlegt því við það missti hún af ýmsu sem vinir hennar voru að upplifa. Eftir áskorun kærasta síns tók hún stólinn með í fjölskylduferð til útlanda – og þvílíkur munur fyrir hana og fjölskylduna. Nú gátu allir verið saman – alltaf – og séð miklu meira en annars. Guðrún hafði orku til að gera mun meira en ella og var ekki að niðurlotum komin í lok dags. Ferðin varð því mun skemmtilegri fyrir alla.

 

Dæmi um hjálpartæki eru sérsmíðaðar koltrefjaspelkur sem eru mjög hentugar sem stuðningur fyrir þá sem draga fót/fætur við gang. Þær falla vel að fæti og sjást því ekki undir buxum en geta lagað göngulag til muna, lengt göngugetu og forðað ójöfnu álagi á grind, vöðva og liðbönd. Þvagbindi fyrir konur og karla eru ósýnileg hjálpartæki sem gera búðarferðir og ferðalög mun afslappaðri og þægilegri þar sem ekki þarf alltaf að svipast um eftir salerni. Baðstóll eða –seta í sturtuna eykur öryggi. Léttur hjólastóll eða (litlar) rafskutlur gera útivist og ferðalög mun þægilegri, ekki aðeins fyrir notandann heldur einnig fyrir samferðafólkið.

 

Hægt er að fá hjálpartæki til aðlögunar á heimili og vinnustað.

 

Gagnlegt getur verið að skoða vefsíður verslana og fyrirtækja með hjálpartæki til að sjá hvaða hjálpartæki eru til. Fyrir mörg hjálpartæki er hægt að sækja um greiðsluþátttöku Sjúkratrygginga Íslands (SÍ) að hluta eða öllu leyti. Hægt er að leita til sjúkraþjálfara og iðjuþjálfara um val á hjálpartækjum og þeir geta einnig sótt um hjálpartæki til SÍ.

 

Verslanir með ýmis hjálpartæki, stór og smá, eru t.d. Eirberg, Fastus, Stoð, Öryggismiðstöðin og Össur en besta úrvalið af þvagbindum og öðrum þvagvörum er hjá Logalandi, Rekstralandi og Rekstrarvörum.

 

Hægt er að leigja ýmis hjálpartæki til lengri eða skemmri tíma, bæði hér heima (t.d. hjá Eirbergi, Stoð og Öryggismiðstöðinni) sem og á ferðalögum erlendis.

 

 

Sjá vefslóð á vefsíðu MS-félagsins um hjálpartæki hér.

Sjá vefslóð Sjúkratrygginga Íslands um hjálpartæki hér.

Sjá reglugerð um styrki vegna hjálpartækja hér (listi yfir hjálpartæki frá bls. 5).

 

 

 

Bergþóra Bergsdóttir