Kórónavírusinn og MS

Uppfært 6.3.2020:  

Alþjóðasamtök MS hafa nú boðað ráðgjafa sína í læknisfræði og vísindum á alþjóðavísu á fund til að fara yfir leiðbeiningar um MS-meðferðir í tengslum við COVID-19 vírusinn. Fundurinn verður þann 11. mars og mun MS-félagið flytja fréttir af honum um leið og þær berast.

 

Nýji kórónavírusinn (2019-nCoV) er öndunarfærasjúkdómur sem ekki hefur sést áður hjá mönnum. Þessi nýi stofn kórónavírussins fannst fyrst í Kína í desember 2019 og hefur síðan breiðst út til annarra heimshluta.

 

Hvað þýðir kórónavírusinn fyrir fólk sem er með MS?

Þar sem þetta er nýr stofn kórónavírussins, þarf að afla betri vitneskju um hvernig hann getur haft áhrif á fólk með MS.

Mörg MS lyf bæla eða breyta ónæmiskerfinu (s.s. sterar eða líftæknilyf). Vitað er að fólk með MS sem er á slíkri ónæmisbælandi meðferð getur verið í aukinni hættu vegna fylgikvilla sem tengjast veirusýkingum, en á þessari stundu er óvíst hvort það auki líkur á alvarlegri kórónaveirusýkingu.

Ef þú ert á ónæmisbælandi meðferð og ert annað hvort útsett(ur) fyrir kórónavírus eða staðfest er að þú sért með kórónavírussýkingu, vinsamlegast hafðu samband við heilsugæsluna í síma 1700 eða 544 4113.

 

Hver eru einkenni kórónavíruss og hvernig er hægt að verjast honum?

Meðal einkenni kórónavírussins eru öndunarerfiðleikar, hósti og hár hiti, sem getur leitt til lungnabólgu.

Alþjóðaheilbrigðismálastofnunin leggur til nokkrar grundvallarráðstafanir til að verjast nýja kórónavírusnum. Þær eru:

• Þvoið hendurnar oft með sápu og vatni eða handspritti
• Hóstið og hnerrið í krepptan olnboga eða pappír
• Forðist náið samneyti við fólk sem er með hita, kvef eða flensueinkenni
• Gætið hreinlætis og forðist snertingu við augu, nef og munn
• Varist snertifleti á fjölförnum stöðum svo sem handrið, lyftuhnappa, snertiskjái, greiðsluposa og hurðarhúna
• Gætið hreinlætis við matargerð með því að nota mismunandi skurðarborð fyrir hrátt kjöt og soðinn mat og þvoið hendurnar á milli

Það er mikilvægt að forðast snertingu við alla sem kunna að hafa búið eða ferðast á svæði þar sem kórónavírussins hefur orðið vart. Fylgist með nýjustu fréttunum af kórónavírusnum á vef Embættis landlæknis hér eða hjá Alþjóðaheilbrigðismálastofnuninni hér

 

Helstu spurningar og svör um nýja kórónavírusinn:

Vefur Embættis landlæknis

Vefur Alþjóðaheilbrigðismálastofnunarinnar

 

Leiðbeiningar landlæknis um handþvott

 

Stutt upplýsingamyndband á ensku frá Alþjóðaheilbrigðismálastofnuninni

 

 

Þýtt og endursagt af BÓ

Heimildir:

Frétt á heimasíðu Alþjóðasamtaka MS – msif.org

Upplýsingar á heimasíðu Embættis landlæknis – landlaeknir.is

Mynd með frétt tekin af heimasíðu Embættis landlæknis.